Novas
«Proxecto Lugares», a transformación do espazo público do Camiño de Santiago
Desenvolverase entre o 18 e o 22 de abril nas aldeas de Palas de Rei (Lugo) e Seadur (Ourense), sitas no trazado do Camiño Primitivo e o Camiño de Inverno respectivamente, coa presenza de profesionais de diferentes ámbitos, incluído o deseño.
O proxecto, dirixido pola nosa socia Natalia Balseiro, é unha iniciativa impulsada pola Xunta de Galicia a través da Axencia Turismo de Galicia e patrocinada pola Fundación La Caixa dentro do cumprimento do Pacto Verde Europeo, que se desprega nas comarcas da Ulloa e Valdeorras en catro fases de traballo. A primeira, de mediación, realizouse en febreiro de 2023, con axentes sociais de Palas de Rei e da comarca para identificar lugares, materiais e valores no territorio con posibilidade de realizar unha intervención de arquitectura da paisaxe sostible.
A segunda fase consiste na realización dun seminario que se celebrará o 18 e 19 de abril no Castelo de Pambre, un espazo de pensamento no que profesionais da arquitectura, a paisaxe, o deseño e a artesanía abordarán cuestións vinculadas ás intervencións arquitectónicas da paisaxe, desde unha visión sostible e contemporánea, nese espazo público do Camiño de Santiago. José Manuel Andrade e Pedro Calaza da Fundación Juana de Vega, Paola Sangalli, Amparo Moroño, Inés Rir, Verónica Moar, Carlos Seoane, Uqui Permui, Izaskun Chinchilla ou Maé Durant son algunhas das profesionais que participarán neste seminario.
A continuación realizarase un taller na aldea de Seadur (Larouco) os días 20, 21 e 22 de abril, baixo a mediación de Maé Durant e aberto ás comunidades locais, con idea de transmitir coñecementos e crear un prototipo ou maqueta sobre a posible intervención do espazo coas conclusións marcadas no seminario previo de Palas de Rei. O resultado será un novo espazo público que agromará de forma colaborativa.
Nunha última fase, o «Proxecto Lugares» quedará documentado cunha publicación de carácter crossmedia onde se poderá consultar documentación, fotografías e vídeos producidos durante todo o proceso. A intención do proxecto é que teña continuidade ata o vindeiro ano santo, en 2027.
As inscricións ao seminario e ao taller están actualmente cubertas pola limitación física dos espazos, mais hai lista de agarda por se hai baixas de última hora. Máis información, programa completo e inscricións ás diferentes actividades, na web do proxecto.