Unha exposición do Vitra Design Museum homenaxea en Compostela os obxectos cotiáns

Do 6 de xullo ao 29 de agosto de 2012 pode visitarse no Colexio de Fonseca en Santiago de Compostela unha exposición que lles rende homenaxe aos obxectos cotiáns e que nos desvela as historias que se agochan detrás deles. Os protagonistas desta mostra que leva por título Heroes ocultos. Inventos xeniais. Obxectos cotiáns son obxectos coma o lapis, a lata, a cremalleira, o clip, o apósito, a pinza para prender a roupa, o abanico ou o tetrabrik, elementos todos que forman parte do noso día a día e nos que xa non reparamos, pero aos que esta exposición nos ensinará a mirar con outros ollos, descubríndonos aspectos como a fascinante historia da súa invención, as condicións técnicas de fabricación, a súa evolución ou que inspirou os artistas e deseñadores á hora de crealos. Os conservadores do Vitra Design Museum Jochen Eisenbrand e Laura Hompesch son os comisarios desta exposición que nos achega a esas acertadas estratexias creativas e empresarias que conseguiron o éxito, pero que tamén nos descobre que moitas veces é o azar quen se acha detrás de produtos masivos que, en realidade, foran concibidos como algo completamente distinto. Lugar: Colexio de Fonseca Praza de Fonseca, s/n Santiago de Compostela Horario da exposición: De luns a sábado, de 11 a 14 h e de 17 a 20.30 h Domingos e festivos, de 11 a 14 h Visitas guiadas para grupos, cita previa no teléfono 981 554 400